Biðu í þrjá tíma í röð eftir Of Monsters and Men

Hljómsveitin Of Monsters and Men lauk tónleikaferðalagi sínu um Bandaríkin á laugardagskvöld með tónleikum í höfuðborginni Washington. Röð myndaðist fyrir utan tónleikastaðinn þremur tímum áður en húsið opnaði.

Of Monsters and Men kom fram á tónleikum í tengslum við Taste of Iceland-kynningarátakið í Washington á laugardagskvöld. Frítt var inn á tónleikana, en áhorfendur þurftu að panta miða fyrirfram. Allir 2.000 miðarnir voru pantaðir og færri komust að en vildu. Tónleikarnir fóru fram í Fillmore-tónleikahöllinni og Lay Low hitaði upp ásamt hljómsveit sinni. Þremur tímum áður en húsið opnaði hafði röð myndast fyrir utan, sem segir ýmislegt um góðan árangur Of Monsters and Men í Bandaríkjunum.

Tónleikarnir voru þeir síðustu í tónleikaferð Of Monsters and Men um Bandaríkin, en Icelandair og Iceland Naturally styrktu ferðalagið. Uppselt var á alla 20 tónleika hljómsveitarinnar, sem stoppar í nokkra daga á Íslandi áður en hún heldur til meginlands Evrópu. Of Monsters and Men sendi frá sér plötuna My Head is An Animal á dögunum. Hún situr nú í sjötta sæti bandaríska Billboard-listans og hefur selst í meira en 55.000 eintökum.

atlifannar@frettabladid.is