Kröpp lægð fer yfir landið

Einni dýpstu lægð sem sést hefur í júlí við norðanvert Atlantshafið og Ísland er spáð um helgina. Einar Sveinbjörnsson veðurfræðingur skrifar á vefsíðu sína að veðrinu muni fylgja mikið vatnsveður um allt land.

Einar reiknar með hvössum vindi og að úrkomumagnið gæti víða orðið 20-25 mm frá laugardagskvöldi fram á mánudagsmorgun. „20 mm eru svo sem engin ósköp þannig lagað séð í úrkomu,“ skrifar Einar. „En fyrir tjaldbúa og aðra þá sem hyggja á útiveru jafngildir magnið eins og hellt væri hægt og rólega úr 20 mjólkurfernum á hvern fermetra lands.“

Lægsti mældi loftþrýstingur á Íslandi í júlí mældist árið 1901 og var þá 974 hektópasköl. Til samanburðar er reiknað með að í miðju lægðarinnar suðvestur af landinu muni loftþrýstingurinn mælast 964 hektópasköl.

- bþh