Já – við einstöku tækifæri

Á laugardag fá íbúar í Álftanesi og Garðabæ einstakt tækifæri til að segja með beinum hætti hug sinn varðandi framtíð samfélagsins með því að kjósa um sameiningu sveitarfélaganna. Þetta er tækifæri sem íbúar mega ekki láta fram hjá sér fara heldur mæta á kjörstað og segja já. Þetta er tækifæri sem ekki kemur aftur.

Ég hef undanfarin ár farið vel ofan í kosti þess og galla að sveitarfélögin verði eitt. Eftir því sem ég hef kynnt mér málið betur og skoðað fleiri fleti og ýmis álitamál sem sameiningu varðar, því sannfærðari er ég um að íbúar megi alls ekki láta þetta tækifæri fram hjá sér fara heldur krossa við já á kjörseðlinum.

Við megum alls ekki einblína á einn þátt öðrum fremur og taka afstöðu eingöngu út frá því. Líta þarf á málið í víðara samhengi. Kostir og gallar eru vissulega til staðar við svo mikla breytingu sem sameining sveitarfélaga er. Í mínum huga eru kostirnir mun fleiri og mikilvægari. Því segi ég já og skora á aðra að gera slíkt hið sama.