Sigmundur Ernir og Jónína falla líklega af þingi á næsta kjörtímabili

Tveir þingmenn Samfylkingarinnar eiga líklega ekki afturkvæmt á Alþingi næsta kjörtímabil en það eru Sigmundur Ernir Rúnarsson og Jónína Rós Guðmundsdóttir sem lentu í 3. og 4. sætinu í prófkjöri flokksins í Norðausturkjördæmi. Jónína Rós, sem endaði í 3. sætinu, sagði í samtali við fréttastofu RÚV að hún væri vonsvikin yfir árangrinum.

Kristján L. Möller heldur sínu fyrsta sæti, en hann fékk 609 atkvæði af þeim 843 sem greiddu atkvæði í prófkjörinu. Erna Indriðadóttir, sem hefur ekki boðið sig fram áður, lenti í öðru sætinu með 311 atkvæði á bak við sig. Jónína Rós lenti svo í því þriðja og Sigmundur Erni í því fjórða.

Samfylkingin er með þrjár þingmenn í kjördæminu nú, en miðað við skoðanakannanir síðustu mánaða má flokkurinn prísa sig sælan að ná tveimur þingmönnum inn. Þó má ekki útiloka að flokkurinn nái að verja þriðja þingsætið. Það verða þó að teljast hverfandi líkur á að Sigmundur nái kjöri inn á þing.

Það er því ljóst að Sigmundur og Jónína eru fallin af þingi, gangi verstu spár eftir.