Betri Boltavakt á Vísi

Vísir býður lesendum sínum nú enn betri þjónustu en áður í lýsingum frá leikjum í íslenska fótboltanum.

Boltavakt Vísis og Fréttablaðsins var sett á laggirnar árið 2005 til að lýsa leikjum á Íslandsmótinu í knattspyrnu.

Nýtt tímabil hefst í Pepsi-deild karla í dag og það áttunda í röðinni sem verður lýst á Boltavaktinni.

Boltavaktin er hönnuð af starfsmönnum 365 og hefur verið í stöðugri þróun í gegnum árin. Í dag fá lesendur að sjá nýjar viðbætur í lýsingarkerfinu sem mun færa þeim meiri upplýsingar um framvindu leiksins í rauntíma.

Lýsingin á Boltavaktinni verður ítarlegri, með meiri upplýsingum um framvindu leiksins. Ber þar hæst sérstök samantekt á tölfræði leiksins sem uppfærist sjálfskrafa eftir því sem líður á hann.

Eins og áður mun blaðamaður á vellinum lýsa því sem fyrir augu ber auk þess sem umfjöllun og viðtöl við þjálfara og leikmenn birtast eftir leik.

Á þeim dögum þar sem fleiri en einn leikur er í gangi samtímis verður lesendum boðið upp á að fylgjast þeim öllum samtímis á Miðstöð Boltavaktarinnar, www.visir.is/boltavakt. Þar er einnig hægt að komast inn í leiklýsingu hvers leiks.

Það er von Vísis að með þessari þjónustu muni notendur síðunnar fá bestu mögulegu lýsingu frá knattspyrnuleikjum hér á landi.

Hér fyrir neðan má sjá lýsingu frá viðureign KR og Stjörnunnar í Pepsi-deildinni með öllum nýju viðbótunum.