Óverðtryggð lán valda óvinsældum Íbúðalánasjóðs

Ástæðan fyrir því að Íbúðalánasjóður hefur lánað um 45% færri lán í ár miðað við sama tíma í fyrra liggur aðallega í því að bankinn hefur ekki boðið upp á óverðtryggð lán.

Það er því einna helst eftirspurn almennings eftir óverðtryggðum lánum sem hefur valdið því að markaðshlutdeild Íbúðalánasjóðs hrapaði úr 60% í fyrra niður í um 30% í ár.

„Menn sækja í óverðtryggðu lánin og þegar við bjóðum ekki upp á þau dettum við bara út," segir Sigurður Erlingsson, framkvæmdastjóri Íbúðalánasjóðs.

Hann bendir á að þegar verðbólgan er sex prósent sé freistandi að taka óverðtryggt lán með 6,5% vöxtum án verðtryggingar. Þannig hafa lánakjör spilað inn í minnkandi markaðshlutdeild Íbúðalánasjóðs.

Íbúðalánasjóður hefur hingað til ekki boðið upp á óverðtryggð lán en hyggst gera það frá og með haustinu.