Tækifæri í Asíu

Ég hef verið að velta fyrir mér tækifærum íslenskrar hönnunar í Asíu. Hvernig hægt sé að átta sig á bestu mögulegum leiðum inn á þann markað. Framleiðandi minn í Kína hefur fengið ófáar fyrirspurnir frá mér en aðeins hoppað hæð sína yfir einum íslenskum hönnuði á mínum vegum og viljað dreifa honum áfram.

Danir hafa verið að ná árangri í Kína en þeir hafa tekið útflutning til Asíu föstum tökum. Þeir skipta til að mynda kínverska markaðinum upp í nokkur svið og leita að tækifærum fyrir dönsk fyrirtæki innan þeirra. Eitt þessara sviða er um tísku, hönnun og verslun, annað er um arkitektúr og það þriðja um heilbrigðisþjónustu svo dæmi séu tekin.

Danir fókusa á KínaÍ nýjasta hefti Eksportfokus, sem utanríkisráðuneyti Danmerkur gefur út, er fókusinn settur á kínverska markaðinn. Þar kemur fram að þótt hægt hafi á vextinum í Kína þá hafa möguleikar danskra fyrirtækja aldrei verið meiri en einmitt nú (og þá íslenskra að sama skapi).

Þar er einnig vakin athygli á því að Kínverjar ætli að byggja um 50 flugvelli á næstunni, þá muni vanta um 3,5 milljónir vistunarplássa fyrir eldri borgara og að þar sé það stöðutákn að ganga í flottri hönnun.

Möguleikar hönnuða í KínaTil að auka möguleika danskra hönnuða í Kína hafa Danir sett á laggirnar verkefnið Hannað fyrir Asíu, sem fókuserar á hvernig hönnuðir geti aðlagað hönnun sína að hinum kínverska neytanda. Sem eigandi fyrirtækis innan íslenska hönnunargeirans finnst mér sérlega áhugavert hvernig staðið hefur verið að þeim málaflokki með ráðum, upplýsingum og aðgerðum sem stuðla að því að auðvelda markaðssetningu danskrar hönnunar í Kína. Hönnuðir hafa m.a. verið fræddir um liti og form sem tákna annað en við eigum að venjast, eins og það að Kínverjar taka rauðan lit fram yfir þann græna því sá græni þykir ekki falla vel að húðlit þeirra og rúnnuð form fram yfir ferköntuð því þau þykja minna á tunglið sem þykir jákvætt.

Ég er á leið til Kína og Malasíu í tengslum við ráðstefnuna Global Summit of Women í Kúala Lúmpúr í júní á næsta ári. Ég fer með góðum hópi kvenna úr FKA (Félagi kvenna í atvinnulífinu) og hefur sendiherra Íslands í Peking nú þegar nálgast kínverskar viðskiptakonur með það að markmiði að tengja okkur inn í kínverskt viðskiptalíf. Vetrinum verður því varið í að fræðast um kínverska og malasíska markaðinn og tækifærin þar.