Landspítalalóð – 817 gerðu athugasemdir við deiliskipulagið

16. nóvember 2012 06:00

Samtals gerðu 817 aðilar athugasemdir við tillögu að deiliskipulagi á Landspítalalóð. Þar af voru þrjár frá opinberum aðilum, fjórar frá íbúa- og/eða hverfasamtökum og 810 frá einstaklingum.

Flestar athugasemdir voru vegna mengunar, byggingarmagns, aðlögunar að umhverfi, staðarvals og framkvæmdarinnar sjálfrar. Einnig voru gerðar athugasemdir við kostnað og arðsemisútreikninga. Í 519 samhljóða athugasemdum er m.a. skorað á borgina að falla frá deiliskipulaginu.

Er 817 mikið eða lítið?

Þetta er gríðarlegur fjöldi athugasemda og miklu meiri en verið hefur vegna annarra deiliskipulagstillagna. Fjöldann ber að meta í ljósi þess að engin skipuleg samtök stóðu bak við þær og engar auglýsingar hvöttu fólk til að mótmæla.

Fjöldi athugasemda þarf ekki að koma á óvart. Strax eftir staðarvalið árið 2002 byrjuðu athugasemdirnar að birtast. Síðan hafa verið skrifaðar mörg hundruð greinar með málefnalegum athugasemdum í prentmiðla og mörg þúsund pistlar og umsagnir á móti framkvæmdinni í netmiðla. Það sem kemur á óvart er að þeir sem standa að þessum stærstu byggingaráformum Íslandssögunnar skuli enn ekki hafa séð ljósið.

Hvað næst?

Það segir sig sjálft að umhverfislega og framkvæmdalega er erfitt að koma þessum tröllauknu byggingum fyrir og reisa þær innan um fínlega íbúðabyggð. Í opinberri stefnu íslenskra stjórnvalda í byggingarlist segir m.a. að gætt skuli að „heildarmynd og mælikvarða þegar byggt er í og við eldri byggð“. Jafnframt skuli „tryggja heildrænt og sögulegt yfirbragð húsa, götumynda og byggðamynsturs“. Þessi stefnumörkun ætti að tryggja að ekki sé byggt á þann máta sem stendur til að gera á Landspítalalóð.

Eðlilegast væri að talsmenn áformanna einhentu sér í að endurskoða þau frá grunni með það fyrir augum að finna þeim betri farveg. Jafnframt mætti byrja að skipuleggja blandaða byggð íbúða og þjónustu á Landspítalalóðinni. Þetta er eftirsóttur staður sem myndi henta vel margs konar starfsemi og íbúum á öllum aldri.

Líklegast er þó að gerðar verði minniháttar breytingar á tillögunni til málamynda og síðan haldið áfram. Að lokum munu borgarbúar e.t.v. þurfa að láta reyna á nýtt ákvæði um íbúakosningu samkv. sveitarstjórnarlögum. Til þess að slík kosning verði að veruleika þurfa um 20 sinnum fleiri að óska eftir henni en gerðu athugasemdir núna. Það verður að teljast frekar líklegt að það geti náðst með skipulegu átaki.