Staðreyndir um Eir

Málefni Hjúkrunarheimilisins Eirar hafa verið mikið til umfjöllunar síðustu daga. Í því sambandi ber að halda ákveðnum staðreyndum til haga.

Í fyrsta lagi er rétt að undirstrika að rekstur Eirar er í dag tryggur, skilar jákvæðum niðurstöðum og vel að honum staðið.

Í öðru lagi er sá vandi sem um hefur verið fjallað að undanförnu úr fortíðinni kominn á ábyrgð þeirra sem þá ráku heimilið. Á þeim málum hefur nú þegar verið tekið og gripið til viðeigandi ráðstafana.

Í þriðja lagi hefur Hjúkrunarheimilið Eir verið að hluta til fjármagnað með opinberum fjármunum í gegnum framkvæmdasjóð aldraðra, með daggjöldum og með lánum frá Íbúðalánasjóði. Á fjárlögum yfirstandandi árs er gert ráð fyrir útgjöldum til Eirar upp á u.þ.b. 1,5 milljarða króna.

Fjárlaganefnd Alþingis ber skylda til að hafa eftirlit með fjármálum ríkisins og mun sinna því hlutverki sínu varðandi málefni Eirar.

Verst er þó sú staða sem fjöldi eldri borgara hefur verið settur í vegna fjárhagsstöðu Eirar. Þeir einstaklingar sem þar eiga í hlut eiga allan okkar stuðning. Það eru skýr skilaboð til þeirra frá fulltrúum allra flokka í fjárlaganefnd, þvert á flokka, að þeirra hagsmunir verði tryggðir eins og mögulegt er að gera. Það er sömuleiðis nauðsynlegt að undirstrika að séð verður til þess að Hjúkrunarheimilið Eir mun áfram hér eftir sem hingað til veita alla þá þjónustu sem veitt er í dag.

Það er síðan brýnt að unnið verði hratt og vel að lausn fjárhagsvanda Eirar í samstarfi allra hlutaðeigandi aðila. Fjárlaganefnd Alþingis mun koma að þeirri vinnu eins og þörf er á hverju sinni.