Atvinnumál í forgang

Aukin fjárfesting og verðmætasköpun í atvinnulífinu er eitt brýnasta verkefni næstu ára. Þannig sköpum við störf og bætum afkomu heimilanna í landinu. Ég hef starfað að atvinnuþróunarmálum víða um land drjúgan hluta starfsævinnar og hef nú ákveðið að gefa kost á mér í 3.–4. sæti á lista Samfylkingarinnar í Reykjavík í þeirri trú að reynsla mín og starfskraftar nýtist við að fylgja eftir metnaðarfullri atvinnustefnu okkar jafnaðarmanna.

Systurhreyfingar okkar á Norðurlöndunum hafa leitt uppbyggingu einhverra samkeppnishæfustu samfélaga heims þar sem áherslan er jöfnum höndum á menntun, rannsóknir, öflugt velferðarkerfi og blómlegt athafnalíf. Hér þurfum við að byrja á að bæta starfsumhverfi lítilla og meðalstórra fyrirtækja og gera stoðkerfi og nýsköpunarstuðning einfaldari og skilvirkari.

Í gegnum aðildarviðræður við ESB tengjumst við hinu öfluga atvinnuþróunarstarfi sambandsins og leggjum grunn að lausn til framtíðar í gjaldmiðilsmálum og betra starfs- og samkeppnisumhverfi íslenskra fyrirtækja. Þingflokkur jafnaðarmanna þarf að búa að þekkingu og reynslu á þessari hlið Evrópusamvinnunnar. Sem sjálfstætt starfandi ráðgjafi hef ég á undanförnum árum unnið með mörgum aðilum að undirbúningi Evrópuverkefna og miðlun reynslu.

Á þessu kjörtímabili hef ég verið 1. varaþingmaður Samfylkingarinnar í Suðurkjördæmi og nokkrum sinnum tekið sæti á Alþingi auk þess að vera formaður utanríkismálanefndar Samfylkingarinnar og varaformaður fulltrúaráðs flokksins í Reykjavík.

Í störfum mínum að atvinnuþróunarmálum og á vettvangi stjórnmálanna hef ég sannfærst um að bestum árangri náum við með samvinnu sem nær þvert á alla landshluta og dregur fram styrkleika og sérstöðu hvers og eins. Við erum ein þjóð og samstaðan gefur okkur kjark og sjálfstraust til að takast á við verkefnin fram undan og eiga gefandi samstarf við aðrar þjóðir.