Skjárinn tapaði um 300 milljónum í fyrra

Skjárinn ehf., sem rekur SkjáEinn, SkjáBíó, SkjáHeim og SkjáGolf, tapaði 285 milljónum króna í fyrra. Það er tæpum hundrað milljónum króna minna en félagið tapaði árið áður. Samtals nemur tap Skjásins á árunum 2010 og 2011 663 milljónum króna. Eigið fé félagsins var neikvætt um 653 milljónir króna um síðustu áramót. Þetta kemur fram í nýbirtum ársreikningi þess.

Velta Skjásins, sem samanstendur af tekjum af sölu áskrifta og auglýsinga, jókst hins vegar um 350 milljónir króna á milli ára og var tæplega 1,9 milljarðar króna.

Friðrik Friðriksson, framkvæmdastjóri Skjásins, segir reksturinn hafa gengið enn betur í ár en í fyrra. „Það hefur orðið mjög mikill bati hér á tveimur árum. Ástæðan er blanda af mörgu. Undirliggjandi rekstrareiningar, sem eru nokkrar, hafa allar staðið sig ágætlega. Svo hefur verið stíft aðhald í rekstri líkt og þarf að vera.“

Spurður hvort það sé fyrirsjáanlegt að Skjárinn skili hagnaði í náinni framtíð svarar Friðrik því játandi. „Við förum nálægt því á þessu ári. Þetta er allt annað umhverfi í dag en það sem við höfðum verið að vinna í. Við höfum ekkert verið að flagga því, en ég skal ekkert neita því að þetta hefur gengið vonum framar að snúa þessum rekstri við. Þetta lítur vel út hjá okkur og menn eru bjartsýnir.“

Skjárinn skuldar móðurfélagi sínu Skiptum 1,4 milljarða króna og jukust þær skuldir um tæpar 400 milljónir króna á síðasta ári. Vegna þessara skulda greiddi Skjárinn móðurfélaginu Skiptum 94 milljónir króna í vexti á árinu 2011. Á síðustu tveimur árum hafa vaxtagreiðslur til Skipta numið um 154 milljónum króna.

Eigandi Skjásins eru Skjá miðlar ehf., sem er að öllu leyti í eigu Skipta. Skipti er einnig móðurfélag Símans. Skjárinn keypti vöru og þjónustu frá Skiptum, Símanum og dótturfélagi hans Mílu fyrir samtals 405 milljónir króna í fyrra. Auk þess greiddi félagið 94,2 milljónir króna í vexti til Skipta vegna lána sem félagið veitti Skjánum. Á árinu 2010 keypti Skjárinn þjónustu af sömu félögum fyrir 343 milljónir króna og greiddi Skiptum 59,6 milljónir króna í vexti.