Snjallsíminn greiðslumáti framtíðarinnar

Áhugasamir Íslendingar geta átt þess kost eftir næstu áramót að nýta snjallsíma til að greiða fyrir vörur og þjónustu. Íslenska kortafyrirtækið Valitor stendur fyrir þessu verkefni í samstarfi við Visa Europe og hugbúnaðarfyrirtækinu Oberthur Technologies. Markmiðið er að innleiða nýja tækni sem býður upp á snertilausar kreditkortagreiðslur með snjallsíma við posabúnað.

„Þetta eykur hagræði fyrir neytendur og kemur sér líka vel fyrir kaupmenn þar sem kaup ganga fljótar fyrir sig," segir Henrik Bromée frá Visa Europe, en hann var staddur hér á landi til að kynna tæknina á ráðstefnu um kortaviðskipti á alþjóðlegum vettvangi sem Valitor stóð fyrir.

Visa prófaði tæknina með góðum árangri á Ólympíuleikunum í London, að sögn Henriks, en hann segir Ísland vera kjörinn vettvang fyrir næsta tilraunaverkefni.

„Bæði eru Íslendingar sér á báti hvað varðar kortaeign og notkun, en hér eru 2,5 Visakort á hvern mann, samanborið við innan við eitt á mann í Evrópu, og svo er snjallsímanotkun líka mjög útbreidd."

Kristján Harðarson, sviðsstjóri markaðs- og þjónustusviðs Valitor, tekur undir það og bendir á að samkvæmt nýlegri könnun MMR sé yfir helmingur landsmanna með snjallsíma.

Kerfið gengur þannig fyrir sig að notandi fær útgefið sérstakt símkort með innbyggðri flögu frá kortafyrirtækinu, og setur svo upp forrit í símanum sínum, en fyrsta kastið verður hægt að setja það upp í tveimur tegundum af Samsung-símum.

Við kaup fyrir lægri upphæð en 3.500 krónur nægir að bera símann upp að posanum, en fyrir hærri upphæðir þarf að slá inn pin-númer á símann. Vilji notendur hins vegar auka öryggið enn frekar er hægt að búa svo um að pin-númer sé alltaf notað.

Hvað varðar öryggi segir Kristján að þetta nýja fyrirkomulag sé í engu óöruggara.

„Síminn er í raun greiðslukort, en í þessu nýja kerfi er hægt að loka fyrir kortið með tilkynningu til okkar enn hraðar en nú er mögulegt. Þannig er nýja kerfið enn öruggara að mörgu leyti."

Hvað varðar kostnað segir Kristján að ljóst sé að kaupmenn munu ekki bera aukinn kostnað af þessu fyrirkomulagi, en hvað notendur áhrærir segir Kristján að ekkert hafi enn verið ákveðið en það muni skýrast með reynslunni.

Henrik segir aðspurður að Visa Europe líti þannig á að framtíðin liggi á þessu sviði. „Forstjórinn okkar hefur að minnsta kosti látið hafa það eftir sér að árið 2020 verði allar færslur með Visa gerðar með síma eða álíka tæki."

Sé þó litið til nánustu framtíðar hér á landi hefur tilraunaverkefnið verið í undirbúningi frá því í febrúar og á næstu vikum verður komið upp posum á sölustöðum á höfuðborgarsvæðinu. Fyrir áramót munu fimmtíu korthafar fá tilboð um að prófa kerfið til að ganga úr skugga um að allt verði til reiðu í upphafi næsta árs þegar þúsund símkort og þrjú þúsund snertilaus greiðslukort verða gefin út og allt fer á fulla ferð.

„Þannig verður það út næsta ár," segir Kristján, „en ef að allt gengur að óskum, eins og ég býst við, verður jafnvel hægt að stíga skrefið til fulls fyrr."