Aðalmeðferðinni á að ljúka í dag

Síðdegis í dag á að ljúka aðalmeðferð sem hófst í gærmorgun fyrir Héraðsdómi Reykjavíkur í máli sérstaks saksóknara gegn Aroni Pétri Karlssyni kaupsýslumanni. Aron er grunaður um fjársvik í tengslum við sölu á stórhýsi við Skúlagötu 51 til kínverska sendiráðsins.

Þrjú ár eru síðan rannsókn málsins hófst. Fram kemur í umfjöllun Vísis.is að Aron hafi við aðalmeðferðina í gær borið við minnisleysi um veigamikil atriði málsins.

Embætti sérstaks saksóknara gaf um miðjan apríl á þessu ári út ákæru á Aron, sem er sonur Karls Steingrímssonar (oft kenndur við Pelsinn). Húsnæðið sem kínverska sendiráðið keypti var áður í eigu félags þeirra feðga.

Ákæran á hendur Aroni byggir á því að hann hafi í desember 2009 komið sér og félagi sínu undan skuldum, með því að skjóta húseigninni að Skúlagötu 51 úr félaginu Vindasúlum ehf. inn í eignarhaldsfélagið 2007 ehf., skömmu áður en húsið var selt til kínverska sendiráðsins fyrir 875 milljónir króna.

Á húsinu hvíldu tryggingabréf í eigu Arion banka, Glitnis og Íslandsbanka, upp á um einn milljarð króna, og töldu bankarnir að með eignatilfærslunni hefðu þeir verið snuðaðir um 300 milljónir króna.