Viljum við að allir sitji við sama borð?

Ofangreindri einföldu spurningu Alþingis Íslendinga er okkur boðið að svara í þjóðaratkvæðagreiðslu á laugardaginn kemur. Með þakklæti í huga til allra þeirra fjölmörgu einstaklinga sem komu að undirbúningi og gerð tillagna stjórnlagaráðs segi ég:JÁ! Ég vil að tillögur stjórnlagaráðs verði lagðar til grundvallar frumvarpi að nýrri stjórnarskrá.

Í kynningariti Lagastofnunar Háskóla Íslands fyrir þjóðaratkvæðagreiðsluna eru m.a. eftirfarandi upplýsingar. Núgildandi stjórnarskrá lýðveldisins á rætur að rekja til stjórnarskráa frá 1874 og 1920. Við lýðveldisstofnun 17. júní 1944 var ekki öðru breytt en því sem nauðsynlegt var vegna sambandsslita við Danmörku. Til stóð að endurskoða stjórnaskrána síðar. Einnig að tilraunir til heildarendurskoðunar á stjórnarskránni hafa ekki borið árangur. Þessar staðreyndir segja okkur hversu dýrmætt tækifæri það er fyrir okkur öll að mæta á kjörstað og vera þátttakendur í sögulegum atburði í lífi þjóðar okkar.

Málefni stjórnarskrárinnar eru hafin yfir flokkspólitískar þrætur og dægurmálaþrætur. Mætum öll á kjörstað og svörum spurningunni, viljum við sem byggjum Ísland réttlátara samfélag þar sem allir sitja við sama borð?