Merkisdagurinn 20. október

Við sem byggjum Ísland viljum skapa réttlátt samfélag þar sem allir sitja við sama borð“. Þannig hefst inngangur að nýrri stjórnarskrá sem þjóðin fær að taka afstöðu til 20. október næstkomandi.

Mikilvægt er að mæta á kjörstað og segja sína skoðun. Þeir sem ekki greiða atkvæði eru að eftirláta öðrum að taka ákvörðun fyrir sína hönd. Að lokinni þjóðaratkvæðagreiðslu fær Alþingi svo málið til meðferðar. Þá skiptir miklu að Alþingi virði ferlið allt til enda og geri engar efnisbreytingar á stjórnarskránni. Þjóðin er að skrifa stjórnarskrá, ekki alþingismenn, og vilji hennar er að mótast í gegnum þjóðfund og þjóðaratkvæðagreiðslu. Skynsamlegt er svo að leggja fullbúna stjórnarskrá í þjóðaratkvæðagreiðslu samhliða þingkosningum vorið 2013.

Hrunið leiddi fram stórkostlega galla á stjórnskipan Íslands og ein af meginkröfum þjóðarinnar veturinn 2008-2009 var ritun nýrrar stjórnarskráar. Endurskoðun hennar hefur verið á dagskrá síðan 1944 en í tæp sjötíu ár hafa hagsmunaöflin með fulltrúa sína á Alþingi staðið í vegi alvöru breytinga. Það var ekki fyrr en þjóðin sjálf fékk að ráða, að ákvæði eins og t.d. þjóðareign á auðlindum komst í stjórnarskrá. Nú er verið að skrifa stjórnarskrá almennings „þar sem allir sitja við sama borð“ og þess vegna er mikilvægt að taka þátt 20. október.