Markaðssetja íslenskar heilsuvörur í Kína

Lyfjafyrirtækið Alvogen hefur hafið samstarf við íslensk útflutningsfyrirtæki um markaðssetningu og sölu á íslenskum heilsuvörum í Kína. Fram kemur í tilkynningu frá Alvogen að samstarfsaðilarnir búist við því að árlegt söluverðmæti varanna verði um 700 milljónir króna.

Íslenskir samstarfsaðilar Alvogen eru Purity Herbs, Ensímtækni og Lýsi en Alvogen hefur til skoðunar að hefja samstarf við fleiri íslensk fyrirtæki á þessu sviði.

Fyrstu íslensku vörurnar voru settar á markað í Kína í fyrra og eru nú seldar í átján borgum víðs vegar um landið. Vörurnar eru markaðssettar undir vörumerkinu Pure Iceland. Dr. Lue, framkvæmdastjóri Alvogen í Kína, sótti Ísland nýverið heim og kynnti sér starfsemi íslensku fyrirtækjanna.

Alvogen er alþjóðlegt lyfjafyrirtæki með höfuðstöðvar í Pine Brook í Bandaríkjunum en forstjóri þess er Róbert Wessmann, fyrrverandi forstjóri Actavis. Greint hefur verið frá því í fjölmiðlum að Alvogen skoði nú möguleikann á því að reisa lyfjaverksmiðju á Íslandi en um tuttugu starfsmenn fyrirtækisins hafa aðsetur á Íslandi.- mþl