Til Íslands að leysa fjölskylduráðgátuna

Ítalski verkfræðingurinn Giuseppe Massaro er staddur hér á landi til að fræðast um afdrif afa síns Salvatore Massaro en enginn veit af hverju hann tók sig til og flutti til Íslands árið 1954. Bjó hann hér á landi til dauðadags árið 1960.

Brotthvarf Salvatores Massaro olli miklu róti sem verið hefur viðvarandi í stórfjölskyldunni allar götur síðan.

„Afi var sendur til Eþíópíu í stríðinu meðan Ítalir voru með sitt hernaðarbrölt þar," segir Massaro. „Þá var hann tekinn til fanga og sat um árabil í breskri dýflissu. Svo þegar hann sneri aftur til Sikileyjar, þaðan sem ég er, ákvað hann að flytja á brott. Hann dvaldi um hríð í Róm en fór svo til Íslands af einhverjum ástæðum sem enginn veit."

Frá því að Giuseppe Massaro kom til landsins hefur hann spurst fyrir um afa sinn en brotthvarf hans var slíkt hneykslismál á Sikiley að ekki var um hann talað. „Hvorki amma né pabbi minntust á hann og fóru undan í flæmingi þegar á þau var gengið," segir Massaro.

„Ég hef hins vegar komist að ýmsu hér á Íslandi enda hefur fólk verið afar vinsamlegt og hjálplegt. Mér þykir náttúrlega mest um það að allir bera honum vel söguna. Hann hefur greinilega verið góður maður en fólk hefur einnig sagt mér að hann hafi verið svolítill einfari og að einhver depurð hafi verið yfir honum," segir Massaro.

„Ég komst líka að því að hann sendi ömmu ávísun og leiðbeiningar um það hvernig pabbi, sem þá var á unglingsaldri, átti að koma sér til Íslands."

Af þessari ferð varð þó aldrei að sögn Massaro en hann segir ömmu sína hafa sagt að bankinn hafi hafnað ávísunni. „Mig grunar þó að það hafi ekki verið ástæðan heldur hitt að amma vildi ekki sjá á eftir syni sínum til Íslands."

Faðir Giuseppes Massaro Íslandsfara lést á síðasta ári en fjölskyldan hefur fylgst vel með framgangi mála í ferðinni.

„Mér finnst eins og það hafi náðst sátt í stórfjölskyldunni eftir að þetta allt kom í ljós. Og þegar ég sá grafreit afa míns hér á Íslandi fannst mér eins og meinið sem hlaust af brotthvarfi hans hefði horfið. Ég heyri það líka á fólkinu mínu úti að það ríkir nú loksins sátt."

Um Salvatores:

Salvatore Massaro kom hingað til lands árið 1954 og bjó í Keflavík. Hann vann fyrstu þrjú árin við vegavinnu og hafnargerð en síðar setti hann upp verkstæði þar sem hann gerði við klukkur og heimilistæki enda var hann afar flinkur í höndunum. Hann lést árið 1960. Eftir andlátið birtist auglýsing um dánarbúið í Morgunblaðinu og Alþýðublaðinu.

jse@frettabladid.is