Skoraði sigurmarkið í fyrsta leiknum

Breiðablik vann í gær frábæran sigur á ÍBV, 1-0, á Kópavogsvelli í 13. umferð Pepsi-deildar karla í knattspyrnu. Nichlas Rohde, nýr leikmaður Breiðabliks, gerði eina mark leiksins en með sigrinum stöðvuðu Blikar sex leikja sigurgöngu ÍBV í deildinni.

Blikar voru virkilega sprækir í leiknum í gær og sóknarmenn liðsins lögðu mikið á sig. Varnarleikurinn var til fyrirmyndar og fínn bragur á lærisveinum Ólafs Kristjánssonar, þjálfara Breiðabliks. Það vantaði aftur á móti allan neista í lið Eyjamanna og þar á bæ féllu menn á prófinu um að stimpla sig fyrir alvöru í toppbaráttu deildarinnar.

„Þetta var frábær leikur fyrir mig persónulega, að skora og ná í sigur í fyrsta leik," sagði Nichlas Rohde, leikmaður Breiðabliks eftir sigurinn í gær .

„Ég hafði fengið þrjú góð færi sem markvörður þeirra varði vel en loksins datt þetta fyrir mig og boltinn endaði í netinu."

Rohde er danskur og kom á láni til félagsins frá Nordsjælland en hann er fæddur árið 1992.

„Gæðin á knattspyrnunni virðast vera fín hér á landi en ég var einnig virkilega jákvæður áður en ég kom til landsins. Ég hlakka til næstu leikja og það er alltaf markmiðið að skora í hverjum leik."