Eins og eftir handriti

Nýliðar ÍA hafa farið frábærlega af stað í Pepsi-deildinni. Þeir hafa unnið fyrstu tvo leiki sína. Lykilmaður í báðum sigrum er markvörðurinn Páll Gísli Jónsson sem hefur varið eins og berserkur.

„Þetta var alveg óþolandi," sagði Páll Gísli sposkur um sigurinn í leiknum gegn KR en heyra mátti á honum að menn voru enn hátt uppi. „Það var ekki hægt að biðja um það betra. Þetta var eins og eftir handriti. Að fá KR í fyrsta leik heima og vinna."

Páll Gísli neitar því ekki að hann er ánægður með eigin frammistöðu og má vel vera það.

„Ég er í flottu formi og betra en undanfarin ár," sagði markvörðurinn knái en hann hefur lent í miklum meiðslum í gegnum tíðina.

„Það var árið 2008 sem ég fékk brjósklos og sleit krossband. Ég missti alveg af tímabilinu 2008 og rétt náði nokkrum leikjum sumarið 2009. Var svo að koma upp 2010 og það er í raun ekki fyrr en í fyrra sem ég komst aftur í almennilegt form."

Þrátt fyrir mikið mótlæti kom það aldrei til greina hjá Páli Gísla að gefast upp og hætta.

„Það var aldrei inn í myndinni enda er þetta svo gaman. Auðvitað tók það á að rífa sig upp aftur en ég lufsaðist í gegnum það og þá var þetta komið."

Páll Gísli þakkar styrktarþjálfaranum Dean Martin fyrir það í hversu góðu formi hann sé. Martin, sem orðinn er 39 ára, er sjálfur í frábæru formi og átti fína innkomu í leikinn gegn KR þar sem hann lagði upp sigurmark leiksins.

„Hann er vélmenni. Ótrúlegur maður. Hann er með þetta og gæti mætt á vaxtarræktarmót eftir tíu mínútur ef hann vildi. Hann væri ekki í neinum vandræðum með það."

Markvörðurinn nýtur þess einnig að vera hjá þjálfara, Þórði Þórðarsyni, sem var áður markvörður og síðar markmannsþjálfari Páls Gísla áður en hann tók við sem aðalþjálfari ÍA.

„Mér finnst það meiri háttar. Hefðbundna markmannsþjálfunin hefur minnkað en við markverðirnir fáum samt æfingar sem við förum eftir. Hann æfir okkur meira sér á veturna. Hann var líka frábær markmannsþjálfari og ég bý vel að því sem hann kenndi mér. Hann Þórður veit alveg hvað hann syngur."

Lítið hefur farið fyrir Þórði þjálfara en hann er einn fárra markvarða sem hafa farið í þjálfun. Páll Gísli segir hann vera góðan þjálfara.

„Þórður er ofboðslega fagmannlegur í öllu sem hann gerir og veit nákvæmlega hvað hann vill. Ég er virkilega ánægður með hann. Ég er handviss um að hann á eftir að gera góða hluti. Hann er granítharður en sanngjarn. Það er ekkert kjaftæði í kringum hann. Hann segir hlutina eins og þeir eru og ef menn geta ekki tekið því þá verður það að vera þannig."

Páll segir að það sé mikil stemning á Akranesi og almenn ánægja með að liðið sé aftur komið í efstu deild.