Ofbeldi gagnvart starfsfólki algengt

Tæpur þriðjungur starfsfólks geðsviðs Landspítalans hefur orðið fyrir líkamlegu ofbeldi síðasta hálfa árið. Um helmingur hefur orðið fyrir andlegu ofbeldi og tæplega fjórtán prósent fyrir kynferðislegu ofbeldi. Gerendur eru í langflestum tilvikum sjúklingar.

Þetta eru niðurstöður rannsóknar sem Dr. Jón Friðrik Sigurðsson, hjúkrunarfræðingur á geðsviði Landspítalans, og Hjalti Einarsson gerðu í apríl síðastliðnum.

Tilgangur rannsóknarinnar var að kanna tíðni ofbeldis gagnvart starfsfólki sviðsins. Þar kom meðal annars fram að þó nokkrir starfsmenn sögðust hafa orðið fyrir ofbeldi oftar en einu sinni á tímabilinu.

„Af þessu má draga þá ályktun að starfsfólk geðdeilda sé í hópi þeirra starfsstétta sem eru líklegastar til að verða fyrir ofbeldi í starfi, sérstaklega starfsfólk sem vinnur hjúkrunarstörf,“ segir Jón Friðrik. „Næstum allir sem svöruðu könnuninni töldu einhverjar líkur á að verða fyrir ofbeldi í starfi sínu og höfðu áhyggjur af því.“

Jón Friðrik segir niðurstöðurnar ríma við sambærilegar kannanir erlendis. Alþjóðlegt málþing um ofbeldi á geðdeildum verður haldið í Háskóla Íslands í dag þar sem niðurstöður rannsóknarinnar verða kynntar frekar. - sv