Krefst upplýsinga um stöðu Landsbankans

Fjárfestirinn Vilhjálmur Bjarnason hefur höfðað mál gegn gamla Landsbankanum til að fá afhent gögn um eign bankans í sjálfum sér og lán til tengdra aðila. Hyggur á skaðabótamál gegn stjórnendum bankans og Björgólfsfeðgum.

„Ég vil fá upplýsingar um bréf sem Landsbankinn átti í sjálfum sér, hafði að veði og lánveitingar til þessara félaga," segir Vilhjálmur Bjarnason, lektor og fjárfestir, sem hefur höfðað mál á hendur slitastjórn Landsbankans og krefst þess að hún afhendi honum gögn um stöðu bankans fyrir og eftir hrun.

Beiðnin var lögð fyrir Héraðsdóm 31. janúar. Þar fer Vilhjálmur fram á upplýsingar um eign Landsbankans í sjálfum sér og fjölda bréfa í sjálfum sér sem lágu að veði fyrir lánum hans á þremur tilgreindum tímapunktum: 31. desember 2006, 31. desember 2007 og loks daginn sem Fjármálaeftirlitið tók bankann yfir, 7. október 2008.

Þá krefst Vilhjálmur sömuleiðis kröfulýsinga hins fallna banka í þrotabú Björgólfs Guðmundssonar og fjögurra félaga sem voru í hans eigu, Fjárfestingafélagsins Grettis, Samsonar, Samson Global Holding og Samson Properties.

„Að baki þessu býr að ef Landsbankinn hefur verið yfir mörkum um eign í eigin hlutabréfum þá er spurning hvort bankinn hefur verið starfhæfur," segir Vilhjálmur. Það geti bakað stjórnendum bankans skaðabótaskyldu gagnvart hluthöfum eins og honum sjálfum. Það sama eigi við ef í ljós komi að reglur um lán til tengdra aðila hafi verið þverbrotnar.

Fram kemur í beiðni Vilhjálms að hann hafi í tvígang sent slitastjórninni bréf vorið 2010 og óskað eftir þessum upplýsingum en hvorugu þeirra hafi verið svarað. Í því síðara hafi komið fram að hann hefði fullan hug á að láta reyna á rétt sinn gagnvart fyrrum stjórnendum bankans og aðaleigendunum, Björgólfi Guðmundssyni og syni hans Björgólfi Thor.

Málið verður tekið fyrir í Héraðsdómi Reykjavíkur á föstudag.stigur@frettabladid.is