Innlent

Ísland hýsi 1% gagna í Evrópu

Gagnaver Verne Global
Gagnaver Verne Global
Gagnaver Verne Global tekur til starfa í byrjun febrúar. Landsvirkjun stefnir á að árið 2020 verði Ísland eitt af tíu stærstu gagnaverskjarnasvæðum í heimi. Stefnt er að því að 1% gagna í Evrópu verði þá hýst á Íslandi.

Landsvirkjun áætlar að Ísland geti orðið í hópi tíu stærstu gagnaverasvæða í heimi árið 2020, ef rétt er haldið á málum. Gangi það eftir mun Ísland geta sinnt einu prósenti af Evrópumarkaði fyrir gagnageymslu.

Ríkarður Ríkarðsson, viðskiptastjóri hjá Landsvirkjun, hélt nýverið erindi um málið. Að hans sögn þarf að koma á samstarfi fulltrúa þriggja hópa til að svo megi fara; orkuiðnaðar, innviða og viðskiptaumhverfis.

Með innviðum er átt við alla sem koma að gagna- og orkuflutningum. Þeir verða að vera áreiðanlegir og kostnaður skýr. Þá skipta staðsetningar miklu; þessi iðnaður krefst nálægðar við eftirspurnina og Ísland uppfyllir þær kröfur varðandi 2/3 af allri eftirspurn í heiminum, sem er í Norður-Ameríku og Evrópu. Gagnaversiðnaðurinn leitar á svæði þar sem orkuafhending er örugg og orkuverð er því oft hátt.

Öll orkufyrirtækin hafa beint sjónum sínum að þessum markaði og jafnvel ráðið starfsmenn úr geiranum til að laða hana að, líkt og Orkuveita Reykjavíkur hefur gert.

Í erindi Ríkarðs kom fram að til að markmiðin um hlutdeild Íslands náist verði allir að gefa skýr skilaboð, orkuiðnaðurinn, dreifingaraðilar, viðskiptalífið og ekki síst stjórnmálamenn.

Verne Global mun hefja starfsemi í gagnaveri sínu í Reykjanesbæ í febrúar. Klippt verður á borða við hátíðlega athöfn 8. febrúar, en unnið hefur verið að uppsetningu versins síðustu fjögur ár.

Katrín Júlíusdóttir iðnaðarráðherra segist mjög ánægð með þessa þróun.

„Það er gríðarlegt fagnaðarefni að hér sé að ryðja sér til rúms ný tegund hátækniiðnaðar á Íslandi. Þetta býður upp á mjög mikla afleidda möguleika í framhaldinu. Í öðru lagi er þetta enn eitt merkið um að hér sé erlend fjárfesting aftur að fara af stað. Ég held að með þeirri erlendu fjárfestingu sem við eigum eftir að sjá á þessu ári, með kísilveri í Helguvík og uppbyggingu á Norðausturlandi, munum við sjá mun fjölbreyttari starfsemi en hingað til.“- kóp



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.