Gjaldeyrishöftin eru skjól

Ísland er að mörgu leyti í vari innan gjaldeyrishafta, segir Sigríður Benediktsdóttir, nýr framkvæmdastjóri fjármálastöðugleika hjá Seðlabanka Íslands. Höftin séu lán í óláni í þeim alþjóðlegu erfiðleikum sem nú einkenni alþjóðamarkaði.

Fjármálastöðugleiki hefur styrkst nokkuð frá því síðasta skýrsla bankans kom út í desember sl., en þar vegur ekki síst þungt að bankakerfið hefur styrkst, m.a vegna lægri skulda heimila og fyrirtækja og minni vanskila. Sigríður segir að fjárhagsleg staða heimila hafi batnað nokkuð hratt, en eins og sést á myndinni í meðfylgjandi myndbandi hafa skuldir sem hlutfall af landsframleiðslunni lækkað stöðugt að undanförnu.

„Í aðdraganda hrunsins og svona fyrstu tvö árin eftir það þegar gengið féll voru skuldir íslenskra heimila á Íslandi mjög háar. Það var meira að segja þannig að árið 2010 voru Íslendingar með hæstu skuldir heimila í Evrópu miðað við ráðstöfunartekjur. Miðað við tölur 2011 og spá fyrir árið 2012 frá Seðlabankanum sjáum við fram á að skuldir heimila eru að verða meira viðráðanlegar," segir Sigríður.

Ein helsta áhættan sem snýr að íslenska hagkerfinu eru gjaldeyrishöftin, en uppsafnaður aflandskrónuvandi, þ.e. fjármagn sem líklegt er til þess að fara úr hagkerfinu við afnám hafta, er nú yfir 400 milljarðar króna hið minnsta, auk þess sem íslenskir lífeyris- og verðbréfasjóðir eiga um 200 milljarða á bankareikningum sem gætu viljað út. Sigríður segir þó að höftin séu um margt skjól nú, sökum erfiðrar stöðu erlendis.

„Það er líka alveg augljós áhætta núna erlendis á evrusvæðinu. Grikkland, Spánn og Kýpur er að koma inn núna þó það sé lítið. Það getur haft einhver áhrif á okkur. En við erum náttúrlega í vari í höftum," segir Sigríður.