Metandælan var rangt tengd

Metandæla við bensínstöð N- Eins á Ártúnshöfða brotnaði, þegar strætisvagn rakst utan í hana um fjögur leitið í nótt, með þeim afleiðingum að metan streymdi óhindarð út í andrúmsloftið, vegna rangra tenginga í dælunni.

Slökkviliðið var kallað á vettvang og girti svæðið af þar sem mikil eldhætta var næst dælunni. Síðan varð að kalla út sérfræðinga frá N1 og Sorpu, til að geta stöðvað lekann , en metangasið er leitt í dæluna frá gasvirkjun Sorpu á ruslahaugunum í Álfsnesi. Sem betur fer hefur metan þann eiginleika, ólíkt öðrum gastegundum, að vera mun léttara en andrúmsloftið og stígur því beint upp í logni.

Slökkviliðsmenn voru tvær klukkuustundir á staðnum áður en ástandið taldist tryggt. Í ljós kom að gasið slapp út þar sem slöngur í dælunnni voru rangt tengdar, því öðrum kosti hefði sjálfkrafa lokast fyrir gasflæðið þegar dælan brotnaði. Öryggisnefndir N1 og Sorpu eru nú að fara yfir aðrar sambærilegar dælur og farið verður yfir málið með slökkviliðinu og heilbrigðiseftirlitinu eftir helgi.