Varð fyrir vonbrigðum með dóminn

„Dómurinn er mér mikil vonbrigði og satt best að segja átti ég ekki von á að sannleikanum yrði snúið á hvolf jafn rækilega og raun ber vitni," segir Aron Karlsson. Hann var í dag dæmdur í tveggja ára fangelsi og til að greiða Íslandsbanka, Glitni og Arion banka um 160 milljónir króna i bætur vegna fjársvika tengdum fasteignaviðskiptum. „Niðurstaðan er byggð á röngum forsendum og mér finnst í þessu tilfelli að bankakerfið hafi fengið að njóta vafans í málinu en ég ekki," segir hann.

„Það var í gangi skuldauppgjör við bankana og þeir fengu í sinn hlut ríflega tvöfalt meira en þeir hefðu fengið með nauðungarsölu. Ég bauðst til að afsala eigninni til bankanna meðan á uppgjörsferlinu stóð en því var hafnað. Ferlinu var öllu stjórnað af sérfræðingum bankanna og það er mér hulin ráðgáta hvernig þeir geta fyrst lagt til verðmat en síðan verið ósáttir við það," segir hann. Hann segir að engir baksamningar hafi verið í gangi við einn né neinn og það sé því rangt sem fram komi í dómi héraðsdóms að búið hafi verið að semja við kínverska sendiráðið þegar uppgjör átti sér stað við bankana.

„Málinu verður að sjálfsögðu vísað til Hæstaréttar enda hef ég ekkert gert rangt. Meðan málið er í vinnslu mun ég hins vegar ekki tjá mig frekar um það," segir hann.