Stuðningsgrein: Teikn á lofti

Ein meginstoð Samfylkingarinnar byggir á arfleifð Kvennalistans og baráttunni fyrir kynjajafnrétti á öllum sviðum samfélagsins. Reynslan sýnir að hafa verður fyrir árangri í jafnréttismálum. Fjölgun kvenna í áhrifastöðum er ekki óhjákvæmileg afleiðing aukinnar menntunar og atvinnuþátttöku kvenna. Kynbundinn launamunur hverfur heldur ekki af sjálfu sér. Jafnréttið kemur ekki með kalda vatninu. Nú standa yfir prófkjör hjá Samfylkingunni. Við biðjum þátttakendur að íhuga vel hvernig Samfylkingin birtist kjósendum þegar þjóðin velur sér fulltrúa á Alþingi. Jafnvægi milli karla og kvenna er þar lykilatriði.

Konur urðu helmingur ráðherra

Rannsóknir sýna að konur hafa verið fámennari í hópi frambjóðanda í prófkjörum flokkanna og þeim hefur vegnað verr en körlum bjóði þær sig fram í forystusæti framboðslista. Í kjölfar efnahagshrunsins var uppi krafa um breytingar og endurnýjun. Sú krafa kom konum vel og þeim fjölgaði í öruggum sætum á framboðslistum flokkanna. Í fyrsta skipti var Ísland ekki eftirbátur annarra norrænna ríkja hvað varðar stjórnmálaþátttöku kvenna því konur urðu 43% þingmanna sem var veruleg aukning frá 32% eftir kosningarnar 2007. Konur urðu helmingur ráðherra og kona varð forsætisráðherra í fyrsta skipti í sögu lýðveldisins. Þar tók Samfylkingin forystu og vilji flokksins til að beita sér fyrir jöfnu kynjahlutfalli kom berlega í ljós. Í næstu kosningum verður flokknum mikilvægt að sýna þennan vilja skýrt í verki.

Konur til forystu

Margt bendir til þess að konum muni fækka á Alþingi eftir kosningarnar í vor. Samfylkingin hefur með samþykktum um para- og fléttulista í öllum kjördæmum tryggt að jafnmargar konur og karlar verði í þingliði flokksins. Um nýliðna helgi fór fram val á framboðslistum Samfylkingar í tveimur kjördæmum og karlar hnepptu fyrsta sætið. Nú er uppi krafa um að konur leiði lista í þeim kjördæmum þar sem kosið verður á næstu dögum. Konur hafa verið ríflega helmingur stuðningsmanna flokksins og það er eðlileg krafa að konur veljist til forystu til jafns við karla. Árið 2009 var aðeins ein kona í forystusæti á listum Samfylkingarinnar í kjördæmunum sex. Látum það ekki gerast aftur að karlar leiði og konur fylgi.

Við styðjum Sigríði Ingibjörgu Ingadóttur í forystusæti lista í okkar kjördæmi, Reykjavík. Jafnframt viljum við hvetja til stuðnings við konur í forystusæti sem víðast svo að sómasamlegu jafnvægi megi ná milli kynja á Alþingi. Ekki síst í flokki sem kennir sig við jafnrétti og kvenfrelsi.