Fordæmir árásir Ísraela á Gasa

„Þetta eru váleg tíðindi,“ segir Össur Skarphéðinsson utanríkisráðherra um tugi árása sem Ísraelsmenn gerðu á Gasaströndina í Palestínu í gær. Yfirmaður herafla Hamas-samtakanna var meðal fallinna og þau hétu grimmilegum hefndum.

„Ég fordæmi allar árásir af þessu tagi. Þær koma mér ekki alls kostar á óvart. Ég átti viðræður við fulltrúa Palestínumanna í Genf fyrr í vikunni þar sem þeir bókstaflega spáðu því að innan skamms mundu hefjast átök af þessu tagi,“ segir Össur.

„Ég óttast að þarna sé verið að efna til mikilla og langvinnra átaka og verður auðvitað hugsað til hinna skelfilegu atburða í upphafi árs 2008 þegar Ísraelsmenn fóru með landhernaði á hendur íbúum Gasa. Ég tek eftir því að nú tala Ísraelsmenn líka í þá veru að líklega muni landhernaður fylgja í kjölfarið.“

Össur hefur gagnrýnt Ísraelsmenn harðlega á opinberum vettvangi fyrir framferði þeirra á Gasa. „Þetta undirstrikar það sem við Íslendingar, eftir okkar getu, höfum sagt á alþjóðavettvangi; að forsendan fyrir friði í þessum heimshluta sé að Ísraelsmenn gangi til samninga við Palestínumenn, sem þýðir að þeir verða að láta af landtökum sem þeir hafa stundað linnulítið.“- sh