Íslendingar eru feitastir en fúlsa við brauði

Íslendingar eru feitasta Norðurlandaþjóðin samkvæmt rannsókn á mataræði, hreyfingu og holdafari sem unnin var í fyrra. Landlæknir vann að rannsókninni ásamt sérfræðingum frá Danmörku, Finnlandi, Noregi og Svíþjóð. Þetta er fyrsta samnorræna könnunin þessarar tegundar. Á vef Landlæknis segir að könnunin sé liður í aðgerðaáætlun Norrænu ráðherranefndarinnar um bætta heilsu og lífsgæði með næringu og hreyfingu.

Að mati sérfræðinganna borða milli 9 og 24% fullorðinna í samræmi við þau markmið sem sett eru fram í áætluninni, en aðeins um 8% barna. Danir og Norðmenn standa sig betur en hin löndin hvað þetta varðar en Svíar síst. Konur borða almennt hollari mat en karlar.

Íslendingar borða langminnst af öllu brauði en Danir og Finnar borða mest af rúgbrauði. Þá kemru líka fram að á Íslandi er hærra hlutfall fullorðinna sem teljast of feitir en á hinum Norðurlöndunum. Enginn munur hvað þetta snertir fannst milli barna.

Nánari upplýsingar um málið má finna á vef Landlæknis.