Krefjast afnáms verðtryggingar

Alþingi á að tryggja tafarlaust afnám verðtryggingar á lánsfé og að gildandi lög um neytendavernd séu virt. Þetta kemur fram í ályktun sem var samþykkt á borgarafundi Hagsmunasamtaka heimilanna í Háskólabíói í fyrrakvöld.

Á fundinum var málsókn hjóna gegn Íbúðalánasjóði kynnt, en málsóknin er vegna verðtryggðs fasteignaláns og standa Hagsmunasamtök heimilanna að baki henni. Þórður H. Sveinsson lögmaður skýrði frá málsókninni.

Þá var fjallað um lagafrumvarp um neytendalán sem liggur fyrir þinginu, en samtökin hafa gert miklar athugasemdir við það. Steingrímur J. Sigfússon atvinnuvega- og nýsköpunarráðherra svaraði þeirri gagnrýni sem sett hefur verið fram á frumvarpið.

Mikill hiti var í fundarmönnum en yfir þúsund manns komu saman á fundinum.

Einnig hélt Pétur H. Blöndal alþingismaður erindi til varnar sparifjáreigendum og Guðmundur Ásgeirsson varaformaður Hagsmunasamtaka heimilanna fyrir hönd stjórnarinnar. - þeb