Stendur ekki til að semja við blaðakonuna

Í innanríkisráðuneytinu hefur ekki komið til tals að reyna að ná sáttum við blaðakonuna Erlu Hlynsdóttur um tvö dómsmál sem þegar hafa verið send út til Mannréttindadómstóls Evrópu. Samkvæmt upplýsingum úr ráðuneytinu stendur ekki til að setjast að samningaborðinu í bili en þó er ekki útilokað að ákvörðun um það verði tekin síðar.

Á þriðjudaginn var komst Mannréttindadómstóll Evrópu að þeirri niðurstöðu að íslenska ríkið hefði brotið gegn tjáningafrelsi tveggja blaðakvenna. Það var annars vegar Erla Hlynsdóttir sem fékk dæmdar um 3,4 milljónir króna í bætur.

Erla hefur þegar vísað tveimur öðrum málum til Strassburg og bíða þau nú afgreiðslu dómstólsins. Annars vegar var Erla dæmd fyrir umfjöllun um Byrgismálið svokallaða. Hins vegar var hún dæmd fyrir að kalla Rúnar Þór Róbertsson kókaínsmyglara á forsíðu DV. Ekki hefur verið ákveðið hvort málin komast á dagskrá dómstólssins.

Þrátt fyrir niðurstöðuna á þriðjudaginn hefur ekki verið um það rætt innan veggja innanríkisráðuneytisins að sætta málin tvö sem standa eftir. Í Byrgismálinu reynir að mestu leyti á sömu atriði og í málinu sem féll á þriðjudag að öðru leyti en því að ummælin sem Erla birti voru hvergi til á upptöku. Málið sem varðar Rúnar Þór er hins vegar frábrugðið.

Íslenska ríkið var dæmt til að greiða Erlu 3,4 milljónir í bætur. Samkvæmt upplýsingum úr ráðuneytinu er ríkið skuldbundið til að fylgja þeim dómi. Það er því ómögulegt að skjótast undan þeirri niðurstöðu.