Drengurinn ekki beinbrotinn heldur alvarlega tognaður

Drengurinn sem ráðist var á í Bökkunum í Breiðholti um helgina er ekki jafn illa slasaður og í fyrstu var talið. Fjórir piltar á aldrinum 12 - 13 ára réðust á hann á fótboltavelli þar sem þeir ætluðu að taka af honum fótbolta. Fréttablaðið greindi frá því í morgun að drengurinn hefði beinbrotnað í árásinni. Í ljós hefur komið að drengurinn tognaði alvarlega á hendi og fékk að auki miklar blóðnasir.

Það var Þórarinn Engilbertsson, knattspyrnuþjálfari, sem kom að árásinni um helgina. „Ég var nú ekkert að ýkja," segir Þórarinn sem er búinn að fara í skýrslutöku hjá lögreglunni vegna málsins.

Hann stökkti piltunum á flótta en hljóp uppi einn þeirra, sem sagði honum að þeir hefðu lamið drenginn út af því að þeir vildu fá fótboltann hans. Fjölskylda drengsins sem varð fyrir árásinni er farin af landi brott, en hún hefur haft samband við fjölskyldur þeirra sem eiga í hlut og vinna að því að leysa málið eins og Vísir greindi frá í morgun.

Lögreglan hóf rannsókn á málinu í morgun eftir að þeir lásu um það í fjölmiðlum.