Foreldrar reyna að ná sáttum í fólskulegu líkamsárásarmáli

Unnið er að því að finna lausn á alvarlegu líkamsárásarmáli á milli foreldra barna sem í hlut eiga, en Fréttablaðið greindi frá því í morgun að fjórir 12- 13 ára piltar hafi gengið í skrokk á sex ára dreng um helgina, með þeim afleiðingum að hann handleggs- og kinnbeinsbrotnaði. Samkvæmt upplýsingum frá lögreglunni á höfuðborgarsvæðinu hefur málið ekki borist embættinu enn þá.

Heimildir Vísis herma að foreldrar sex ára drengsins vilji ná lausn í málið með foreldrum drengjanna sem réðust á þann yngri. Öllum er verulega brugðið vegna málsins.

Eins og fram kom í fréttum í morgun þá réðust piltarnir á drenginn á leiksvæði í Bökkunum. Þórarinn Engilbertsson knattspyrnuþjálfari lýsti því þannig að hann hefði verið staddur í Breiðholtinu um helgina þegar hann varð vitni að árásinni. Sá sem fyrir árásinni varð lá þá blóðugur í jörðinni en piltarnir forðuðu sér um leið og Þórarinn bar að.

Hann náði að elta einn piltanna uppi og fékk þá skýringu hjá honum að piltarnir hafi lamið þann yngri því þeir vildu fótbolta drengsins. Þeir þekktu ekki til barnsins.