ÍA getur jafnað nýliðamet Vals í kvöld

Stórleikur kvöldsins í Pepsi-deild karla er á milli Stjörnunnar (3. sæti með 8 stig) og ÍA (1. sæti með 12 stig) en bæði lið eru taplaus og til alls líkleg í toppbaráttu deildarinnar ef marka má upphaf mótsins.

Nýliðar Skagamanna eiga möguleika á því að jafna nýliðamet Valsmanna í Garðabænum. ÍA-liðið hefur unnið fjóra fyrstu leiki sína sem er næst besta byrjun nýliða í efstu deild.

Valsmenn settu metið árið 2005 þegar þeir unnu fimm fyrstu leiki sína. Sigurganga Valsliðsins fyrir sjö árum endaði á tapi á móti verðandi Íslandsmeisturum FH.

Stjörnumenn ógnuðu sjálfir metinu fyrir þremur árum en liðið varð þá að sætta sig við tap á móti FH í 4. umferð eftir að hafa unnið þrjá fyrstu leiki sína.

Aðrir leikir kvöldsins eru: Selfoss-Grindavík, Breiðablik-Fram, Fylkir-Valur og Keflavík-ÍBV.

Flestir sigrar nýliða í röð frá byrjun móts:

5 - Valur 2005

4 - ÍA 2012

3 - Keflavík 1993

3 - Fjölnir 2008

3 - Stjarnan 2009