Umfjöllun, viðtöl og einkunnir: Fylkir - Valur 3-1

Fylkir vann sanngjarnan sigur á Val í fjörugum leik í Árbænum í kvöld. Árni Freyr Guðnason skoraði í tvígang fyrir Fylki áður en, Matthías Guðmundsson minnkaði muninn rétt fyrir hlé. Davíð Þór Ásbjörnsson tryggði stigin þrjú með gulli af marki undir lok leiks úr aukaspyrnu af löngu færi.

Leikurinn byrjaði með miklum látum og höfðu markmenn liðanna í nógu að snúast frá fyrstu mínútu. Fyrsta mark leiksins kom á 13. mínútu þegar Hjörtur Hermannsson sem var að leika sinn síðasta leik fyrir Fylki í bili að minnsta kosti. Hann gengur til liðs við hollenska stórliðið PSV á næstu dögum. Hjörtur gerði vel í að koma boltanum aftur inn í teiginn eftir hornspyrnu og fann Árna Frey Guðnason sem skoraði af öryggi. Hans fyrsta mark í efstu deild.

Eftir markið sóttu Valsmenn án afláts og fengu nokkur upplögð marktækifæri. Það besta fékk Hörður Sveinsson sem á einhvern óskiljanlegan hátt skaut framhjá markinu frá markteig.

Heimamenn bættu við marki á 44. mínútu þegar Finnur Ólafsson sendi frábæra sendingu inn á teig Valsmanna þar sem Árni Freyr var mættur á fjærstöngina og skallaði af mikilli yfirvegun óverjandi fyrir Sindra Snæ Jensson markvörð Vals.

Valsmenn gáfust þó ekki upp og náðu að minnka muninn fyrir leikhlé eftir mikinn darraðadans í markteig Fylkis eftir hornspyrnu. Haukur Páll Sigurðsson náði að leggja boltann fyrir Matthías Guðmundsson sem þakkaði pent fyrir sig. Staðan 2-1 í hálfleik.

Síðari hálfleikurinn einkenndist af mikilli stöðu baráttu og liðin náðu ekki að skapa sér nein teljandi marktækifæri. Fylkismenn féllu til baka og Valsmönnum gekk engan veginn að opna þétta vörn þeirra. Enda réðu tilviljanir einar hvað gerðist sóknarlega hjá Valsmönnum í síðari hálfleiknum. Skiptingar þeirra breyttu engu þar um.

Fylkismenn gerðu svo útum leikinn á 85. mínútu þegar hinn bráðefnilegi Davíð Þór Ásbjörnsson þrumaði knettinum í netið beint úr aukaspyrnu af löngu færi.

Með sigrinum komust Fylkismenn upp í 6. sætið Pepsídeildarinnar en Valsmenn eru komnir niður í það 8.a eftir þriðja tapleikinn í röð.

Árni Freyr: Gaman að skora fyrstu tvö mörkin í sama leiknum

„Við höfum spilað hina leikina betur en ekki náð sigri. það er því mjög gaman að vinna svona baráttuleik. Ekki skemmir fyrir að skora tvö fyrstu mörkin mín í efstu deild í sama leiknum," sagði Árni kátur.

Aðspurður hvort hann sé orðinn 100% heill eftir mikil meiðsl í vetur sagði Árni.

„Nei ég myndi ekki segja það. Ég náði ekki að klára leikinn og fékk aðeins aftan í lærið, en það kemur þegar líður á sumarið.“

Ásmundur: Þungu fargi af manni létt

„Við erum búnir að bíða lengi eftir þessum sigri. Mér hefur fundist að þetta hafi mátt detta í hinum leikjunum þar sem við höfum verið síst lakari aðilinn en í kvöld náðum við loksins að klára dæmið," sagði Ásmundur.

Fylkismenn féllu mikið til baka í síðari hálfleik en það var ekki planið hjá þjálfaranum. „Við vörðumst þeim vel samt sem áður ætluðum við ekki að falla svona langt niður. Maður var stöðugt að reyna að ýta þeim framar.“

Ásmundur var himinlifandi með að Árni Freyr hafi opnað markareikninginn sinn í deildinni. „ Ég vissi að það leyndust nokkur mörk í kallinumm," sagði skælbrosandi Ásmundur Arnarson að lokum.

Freyr: Hlutirnir falla ekki með okkur

„Við erum að fá á okkur mörk úr föstum leikatriðum sem við eigum ekki að gera. Eins fannst mér furðulegt hvernig við gátum verið 2-1 undir eftir spilamennskuna í fyrri hálfleik þar sem við óðum í færum.

Við verðum að sýna meir ró fyrir framan markið og þá kemur fellur þetta með okkur,“ sagði brúnarþungur Freyr Alexandersson aðstoðarþjálfari Vals.