Eyjaklasi á Breiðafirði boðinn á 195 milljónir

Vinahjón sem átt hafa Svefneyjar á Breiðafirði í tuttugu ár bjóða eyjaklasann til sölu. Uppsett verð er 150 til 195 milljónir og þá fylgir tíu manna hraðbátur. Lenda má flugvél í heimatúninu. Hentar í ferðaþjónustu segir fasteignasali.

„Það er erfitt að meta verð á eign eins og þessarar því það er engin viðmiðun,“ segir Sigurbjörn Friðriksson á Fasteignasölunni Torgi, sem nú hefur Svefneyjar á Breiðafirði til sölu.

Óskað er eftir tilboðum í Svefneyjar. Sigurbjörn segir verðhugmyndina á bilinu 150 til 195 milljónir króna. Auk íbúðarhúsa og útihúsa fylgir tíu manna, yfirbyggður hraðbátur og traktor með í kaupunum. Heimatúnið hefur verið notað til lendingar fyrir flugvélar. Engin ábúð er í eyjunum sem eru notaðar til sumardvalar.

Svefneyjar komu til sölu nú eftir áramót. Sigurbjörn segir ekki marga verðandi kaupendur hafa gefið sig fram enn enda sé um dýra eign að ræða. „Þeir sem sýnt hafa þessu áhuga hafa verið með eyjarnar í huga fyrir einhvers konar ferðamannaþjónustu og staðurinn er upplagður í það,“ segir Sigurbjörn.

Það eru þeir Dagbjartur Einarsson og Gissur Tryggvason sem átt hafa Svefneyjar í tæp tuttugu ár. Sigurbjörn segir Dagbjart og Gissur ásamt fjölskyldum sínum hafa lagt mikla natni í uppbyggingu og endurnýjun húsakosts á eyjunum. Auk ýmissa útihúsa séu þar nú tvö góð íbúðarhús með samtals þrettán svefnherbergjum. Húsin geti einmitt nýst vel í ferðaþjónustu.

Dagbjartur, sem býr í Grindavík, er 75 ára og Gissur, sem býr í Stykkishólmi, er 67 ára. Sigurbjörn segir þá telja sig vera komna á aldur og tíma til kominn að aðrir taki við í Svefneyjum eftir að þeir hafi átt þar sínar góðu stundir um árabil.

Svefneyjar, sem áður voru í Flateyjarhreppi en tilheyra nú Reykhólahreppi, eru sögufrægar í meira lagi allt frá landnámsöld. Þar fæddist skáldið og náttúrufræðingurinn Eggert Ólafsson á átjándu öld. Mikil hlunnindi eru í Svefneyjum, meðal annars af um þrjú þúsund æðarhreiðrum, skarfa- og lundaveiði, eggjatöku og sel.

gar@frettabladid.is