Virðisaukaskattur ógnar hótelrekstri í Danmörku

Samtök ferðaþjónustunnar benda á heimasíðu sinni á að kreppa sé í dönskum hótelrekstri vegna hás virðisaukaskatts. Ábendingin er innlegg í umræðu um fyrirhugaða hækkun íslenskra stjórnvalda á virðisaukaskattlagningu á gistinætur úr 7% í 25,5%.

Veltan í Danmörku í hótel- og veitingarekstri hefur minnkað um 7,2% á fyrri hluta ársins miðað við sama tíma í fyrra. Veltuminnkunin á sér stað þó gistinæturnar séu jafnmargar og árið áður. Katja Östergård, framkvæmdastjóri samtaka hótela og veitingastaða í Danmörku, skrifar slæma gengið á hinn háa virðisaukaskatt í Danmörku, en hann er 25%.

„Sérstaklega er samkeppnin erfið við Svíþjóð sem hefur nýlega lækkað virðisaukaskatt af veitingum um helming," segir hún.