Rúta stelpnanna strandaði fyrir framan hótelið | myndband

Það er óhætt að segja að stelpurnar okkar hafi mætt með látum á hótelið sitt í Vrsac í hádeginu. Þær voru reyndar stilltar og prúðar eins og venjulega en það gekk mikið á hjá rútubílsjóranum. Íslenska kvennalandsliðið í handbolta spilar sinn fyrsta leik á EM í Serbíu þegar liðið mætir Svartfjallalandi á morgun

Rútan mætti á staðinn í mikilli lögreglufylgd en fjölmargir lögreglumenn komu þó ekki í veg fyrir að rútan hreinlega strandaði á planinu fyrir framan hótelið. Stelpurnar þurftu að bíða þolinmóðar inn í rútu á meðan bílstjórinn beitti öllum brögðum til þess að losa bílinn sem sat pikkfastur.

Það gekk samt ekkert og loks hleypti serbneski rútubílstjórinn stelpunum út. Þær vissu varla hvaðan á sig stóð veðrið en tóku fljótlega upp myndavélarnar enda ekki á hverjum degi sem liðsrúta liðsins lendir á slíkum villigötum.

Þess ber að geta að allar stelpurnar og starfsmenn liðsins sluppu ómeidd frá þessu óhappi og rútan losnaði fljótlega eftir að stelpurnar og farangurinn var kominn frá borði.