Bergþór og Albert bjóða fólki heim

„Við höfum bara verið að gera þetta í smáum stíl, það var svolítið fyrir jól. Aðalhausverkurinn er bara sá að hvorki ég né Albert [Eiríksson] höfum tíma fyrir þetta," segir Bergþór Pálsson óperusöngvari.

Bergþór og Albert hafa opnað heimili sitt við Lindargötu fyrir litlum hópum sem hafa viljað koma og eiga kvöldstund með parinu. Þeir hafa eldað ofan í fólkið og sýnt því hvernig eigi að haga sér í fínum matarboðum, hvernig eigi að skála og svo framvegis. Bergþór segir að þeir hafi fyrst staðið frammi fyrir því vandamáli hvort þeir þyrftu ekki vottað eldhús. Sú hafi verið raunin og þeir því ákveðið að kalla þetta námskeið, þar með hafi málið verið leyst.

Bergþór og Albert eru ekki þeir fyrstu sem hafa tekið upp á því að bjóða fólki upp á þessa þjónustu því Bergþór Garðarsson, Beggi, og eiginmaður hans, Pacas, hafa einnig boðið upp á sambærileg „námskeið" heima hjá sér í Hafnarfirðinum við miklar vinsældir. -fgg