Frakkar Ólympíumeistarar á öðrum leikunum í röð

Frakkar eru Ólympíumeistarar í handbolta karla eftir eins marks sigur á Svíum, 22-21, í úrslitaleik í London í dag. Frakkar vörðu þar með titil sinn frá því fyrir fjórum árum þegar þeir unnu Íslendinga í úrslitaleik.

Svíar þurfti hinsvegar að sætta sig við fjórða silfrið á Ólympíuleikum en Svíþjóð hefur aldrei náð í Ólympíugull í handbolta karla.

Michaël Guigou var markahæstur hjá Frökkum með 5 mörk og þeir Xavier Barachet, Daniel Narcisse og Luc Abalo skoruðu allir fjögur mörk hver. Niclas Ekberg var markahæstur hjá Svíum með 6 mörk en Jonas Larholm var með 5 mörk.

Svíar byrjuðu vel og voru 5-3 yfir eftir 11 mínútna leik. Frakkar unnu hinsvegar næstu þrettán mínúturnar 7-2, komust í 10-7 og voru komnir með tök á leiknum.

Svíar skoruðu síðasta mark fyrri hálfleiksins og minnkuðu muninn í 10-8 en liðin skoruðu ekki síðustu fimm mínúturnar.

Frakkar náðu aftur þriggja marka forskoti í upphafi seinni hálfleiksins en Svíar náðu að minnka muninn í eitt mark, 16-15, þegar fimmtán mínútur voru eftir.

Svíar misstu þá mann útaf og Frakkar náðu strax þriggja marka forskoti, 18-15. Svíarnir gáfust ekki upp og héldu sér inn í leiknum.

Niclas Ekberg minnkaði muninn í eitt mark, 21-20, þegar hann skoraði úr víti 70 sekúndum fyrir leikslok en Luc Abalo kom Frökkum í 22-20 þegar hálf mínúta var eftir.

Kim Ekdahl du Rietz minnkaði aftur muninn í eitt mark, 22-21, þegar 23 sekúndur voru eftir en Frakkar tóku síðan leikhlé 12 sekúndum fyrir leikslok. Frakkar héldu boltanum til leiksloka og tryggðu sér annað Ólympíugullið í röð.