Miðað við samgönguáætlun sem nú er til afgreiðslu á Alþingi verður framkvæmdum við Norðfjarðargöng flýtt um eitt og hálft ár og Dýrafjarðargöngum um tvö og hálft ár. Þetta verður mögulegt þar sem hluta sérstaks veiðigjalds verður varið til samgöngumála, nánar tiltekið 2,5 milljörðum króna á ári allt fram til ársins 2022.
Þetta kemur fram í fjárfestingarstefnu ríkisstjórnarinnar sem birt var um daginn. Á vefsíðu ríkisstjórnarinnar í dag er bent á að í samgönguáætlun, sem nú er til afgreiðslu á Alþingi, sjáist þegar merki þessarar stefnu ríkisstjórnarinnar, þ.e. að verja hluta veiðigjalds til samgöngumála.
Ólöfu Nordal, þingmanni Sjálfstæðisflokks, finnst vinnubrögð ríkisstjórnarinnar gagnrýniverð.
„Mér finnst ekki hægt að ráðstafa peningum sem er ekki einu sinni búið að tryggja," segir Ólöf Nordal, þingmaður Sjálfstæðisflokks og vísar þar með til þess að frumvarp til laga um veiðigjöld er enn til umræðu á Alþingi. Veiðigjöldin hafa því ekki verið samþykkt og mjög skiptar skoðanir eru um réttmæti þeirra á þingi.
Jarðgangaframkvæmdum verði flýtt í krafti veiðigjalda
