Búið að borga um helming af Icesave

Þrotabú Landsbankans á 122 milljarða króna umfram forgangskröfur, sem nema 1.323 milljörðum króna. Þetta kom fram á kröfuhafafundi sem haldinn var í gærmorgun. Þar kynnti slitastjórn bankans kröfuhöfum stöðu eignasafns hans í lok fyrsta ársfjórðungs 2012. Matið miðast við gengi íslensku krónunnar 22. apríl 2009. Í kynningunni kom einnig fram að raunaukning á virði eigna búsins hafi verið tæpir 77 milljarðar króna frá lokum árs 2011. Sé veiking krónunnar gagnvart helstu gjaldmiðlum heims tekin með í reikninginn nemur aukningin á þessu þriggja mánaða tímabili 117 milljörðum króna.

Virðisaukning eigna þrotabús Landsbankans er að langmestu leyti tilkomin vegna sölunnar á Iceland Foods sem fór fram í febrúar síðastliðnum. Þá seldi Landsbankinn 67,5 prósenta hlut sinn til Malcolms Walker og hóps meðfjárfesta á um 1.050 milljónir punda, um 212 milljarða króna á gengi dagsins í dag. Landsbankinn lánaði kaupendunum um 50 milljarða króna af kaupverðinu. Fram að sölunni hafði Landsbankinn bókfært hlutinn um 33 prósent undir því verði sem fékkst á endanum fyrir hann. Eftir söluna jukust endurheimtur bankans því um 70 milljarða króna.

Auk þess var tilkynnt að slita-stjórn hefði í lok maí greitt út hlutagreiðslu til forgangskröfuhafa í annað sinn. Í þetta sinnið voru um 162 milljarðar króna greiddir út. Áður hafði þrotabúið greitt út 432 milljarða króna í byrjun desember síðastliðins og því hefur slitastjórnin samtals greitt út jafnvirði rúmlega 594 milljarða króna. Það eru um 43 prósent af öllum forgangskröfum í búið. Langstærstur hluti greiðslnanna rennur til tryggingasjóða innstæðueigenda í Hollandi og Bretlandi vegna Icesave-málsins.

Samþykktar forgangskröfur í bú bankans nema 1.323 milljörðum króna. Kröfur tryggingasjóða innstæðueigenda í Hollandi og Bretlandi nema um 86 prósentum af öllum forgangskröfum. Af þeirri upphæð er Tryggingasjóður innstæðueigenda á Íslandi í ábyrgð fyrir 674 milljörðum, eða um helmingi allra samþykktra forgangskrafna vegna tryggingar á lágmarksinnstæðum upp að 20.887 evrum. thordur@frettabladid.is