Sameining FME og Seðlabanka ekki á dagskrá í bili

Þorbjörn Þórðarson skrifar 8. apríl 2012 13:45

Sameining FME og Seðlabankans er framtíðarmúsík sem er ekki á dagskrá á næstu misserum, að sögn efnahags- og viðskiptaráðherra og ósennilegt er að stigin verði skref í þá átt fyrir kosningar, en erlendir ráðgjafar stjórnvalda hafa lagt áherslu á sameiningu þessara stofnana.

Í nýrri skýrslu efnahags- og viðskiptaráðuneytisins um framtíðarskipan fjármálakerfisins er ekkert fjallað um beina sameiningu Fjármálaeftirlitsins og Seðlabankans. Heldur er lagt til að stofnað verði nýtt stjórnvald, svokallað fjármálstöðugleikaráð sem í sætu fullltrúar FME Seðlabanka, ráðuneyta og annarra stofnana.

Finnski bankasérfræðingurinn Kaarlo Jännäri lagði hins vegar til í skýrslu sem hann skrifaði fyrir stjórnvöld árið 2009 að skoða ætti alvarlega að sameina þessar stofnanir sem voru skildar að árið 1998 að erlendri fyrirmynd.

Í ársbyrjun 2011 var undirritaður nýr samstarfssamningur milli FME og Seðlabanka Íslands sem kveður á um mun nánara samstarf milli þessara stofnana en verið hefur.

Steingrímur J. Sigfússon, efnahags- og viðskiptaráðherra, hefur sagt áður t.d í spjallþættinum Klinkinu að sameining þessara stofnana sé eitthvað sem beri að skoða.

Finnst þér ekki ósennilegt að af þessu verði fyrir kosningar. Verður ekki að telja að þetta sé frekar einhvers konar framtíðarmúsík? „Jú, ég myndi reikna með því. Að það væri allavega eitthvað í það. Aðstæðurnar kalla kannski líka á það. Annars vegar er Seðlabankinn með gríðarlega stór og mikilvæg verkefni á sínum herðum," segir Steingrímur.

Steingrímur segir að hjá FME sé einnig mikið annríki sem vonandi sé að talsverðuleyti tímabundið. „Þannig að ég myndi frekar mæla með því að þegar að menn sæju betur til lands í úrvinnslu þessara mála þá gætu menn farið að velta fyrir sér framtíðinni til lengri tíma litið og undirbúið sig undir ákvarðanir um hluti eins og þessa eftir einhver misseri." thorbjorn@stod2.is

Mest lesið

Fleiri fréttir