Erró heiðursborgari Reykjavíkur

Borgarráð samþykkti á fundi sínum, fimmtudaginn 30. ágúst, að gera listamanninn Erróað heiðursborgara Reykjavíkur. Jón Gnarr borgarstjóri tilkynnti þetta við hátíðlega athöfn við opnun sýningar á verkum listamannsins í Listasafni Reykjavíkur í dag.

„Með nafnbótinni vill Reykjavíkurborg þakka Erró fyrir ómetanlegt framlag hans til Reykjavíkurborgar og þjóðarinnar allrar á sviði myndlistar en hann hefur um langa hríð verið þekktasti samtímalistamaður þjóðarinnar á alþjóðavettvangi.

Hingað til hafa aðeins þrír Reykvíkingar verið gerðir heiðursborgarar Reykjavíkurborgar; séra Bjarni Jónsson árið 1961, Kristján Sveinsson augnlæknir árið 1975 og Vigdís Finnbogadóttir árið 2010. Nú bætist heiðursborgarinn Erró í þennan hóp.

Erró ólst upp á Kirkjubæjarklaustri en fluttist til Reykjavíkur 14 ára gamall og bjó þá hjá ömmu sinni og Guðmundu S. Kristinsdóttur, móðursystur sinni, á Frakkastíg 10. Hann gekk í gagnfræðaskóla og síðan í málaradeild Handíða- og myndlistaskólans í Reykjavík. Erró hélt sína fyrstu stóru einkasýningu í Listamannaskálanum árið 1957.

Erró hefur alltaf verið sannur vinur Reykjavíkurborgar. Árið 1989 gaf hann borginni stórt safn verka sinna, um 2.300 talsins. Hann hefur síðan aukið markvisst við gjöfina og telur safnið nú tæplega 4.000 listaverk sem spanna feril listamannsins allt frá barnæsku. Þessi óviðjafnanlega og rausnarlega gjöf er uppistaðan í Errósafni Listasafns Reykjavíkur.

Með listaverkagjöfinni afhenti Erró borginni einnig fjölbreytt gögn um sjálfan sig og list sína. Meðal þeirra eru einkabréf, blaðaúrklippur, bækur, dagbækur, rissblöð og fleira – allt ómetanlegar heimildir um feril listamannsins og hinn alþjóðlega heim myndlistarinnar sem hann hefur lifað og hrærst í á sínum langa starfsferli. Gögnin eru því einnig mikilvægar heimildir um menningarsögu 20. aldarinnar.

Erró hefur ekki látið staðar numið við sín eigin listaverk og heimildir. Hann hefur einnig gefið borginni gott safn verka eftir þekkta erlenda listamenn. Þessi verk eru mikilsverður viðauki við safnið, bæði vegna eigin listræns gildis og ekki síður vegna þess með hvaða hætti þau setja verk Errós í samhengi við aðra listamenn.

Eftir útnefninguna í Listasafni Reykjavíkur þakkaði Erró Reykjavíkurborg kærlega fyrir útnefninguna og sagðist ætla að reyna að vera góður heiðursborgari, borga skattana sína og fara í kirkju á sunnudagsmorgnum," segir í tilkynningu frá Reykjavíkurborg.