Þarf vefsíu gegn barnaklámi

Lögregla telur mikilvægt að Ísland gangi inn í samstarf um netvarnir til að sporna gegn dreifingu myndefnis sem sýnir börn á kynferðislegan hátt. Samkvæmt nýjum lögum liggur allt að tveggja ára fangelsi við því að skoða slíkt efni á netinu. Norsk vefsía stöðvar þúsundir heimsókna á barnaklámssíður þar í landi á hverjum degi.

Í frétt Aftenposten segir frá síunni, sem gengur undir nafninu CSAADF (Child Sexual Abuse Anti Distribution Filter), en hún er þróuð af norsku lögreglunni og fjarskiptafyrirtækinu Telenor.

Sían gengur á gagnagrunni um eitt þúsund vefsíðna sem skilgreindar hafa verið sem ólöglegar. Reyni netnotandi að fara inn á síðuna fær hann upp skilaboð um að síðan sem hann hafi ætlað inn á innihaldi ólöglegt efni. Þessi skilaboð koma upp um 15 þúsund sinnum á sólarhring hjá notendum í Noregi.

Björgvin Björgvinsson, yfirmaður kynferðisafbrotadeildar lögreglunnar á höfuðborgarsvæðinu, segir í samtali við Fréttablaðið að íslensk yfirvöld þekki umrætt kerfi og mikilvægt sé að það verði tekið upp hér á landi. "Við vitum af þessu og höfum lengi talið þörf á að komast inn í samstarfið. Þetta er liður í því að hamla því að slíkt efni streymi inn á einkatölvur."

Sían er ekki ætluð til þess að klófesta þá sem lenda í henni þar sem hún geymir hvorki IP-tölur eða aðrar upplýsingar viðkomandi. Markmiðið er að stöðva dreifingu en að auki hefur sían þau áhrif að trufla forrit sem eigendur síðnanna nota til að innheimta gjald af notendum.

Frá árinu 2009 hefur sían staðið öllum 190 aðildarríkjum Interpol til boða, en aðeins átta þeirra hafa þegið boðið. Þar á meðal eru Danmörk, Svíþjóð og Finnland, en ekki Ísland.

Björgvin segir að lögreglan hafi nýlega hafið samstarf við Europol um að greina myndefni af ofbeldi gegn börnum til að efla fjölþjóðlega gagnagrunna, þar á meðal CSAADF.

Málið hafi verið rætt innan lögreglunnar en sé nú á borði innanríkisráðuneytisins.

Frá ráðuneytinu bárust þau svör að í frumvarpi um lénamál séu ákvæði sem breyti lagarammanum að því leyti að Póst- og fjarskiptastofnun fái heimild til að loka ákveðnum lénum og vefsvæðum. Það ætti að vera grundvöllur fyrir beitingu úrræða á borð við CSAADF síunnar hér á landi.

Ekki tókst að koma frumvarpinu í gegnum þingið fyrir þinglok en það verður væntanlega lagt aftur fyrir þingið eftir sumarfrí.- þj