Fá ekki vínveitingaleyfi að sinni

"Það er formið sem setur okkur stólinn fyrir dyrnar," segir Ólöf Örvarsdóttir, skipulagsstjóri Reykjavíkur, um breytingu á fyrri afgreiðslu embættis hennar á umsókn Hrafnistu um vínveitingaleyfi.

Fyrir tíu dögum sagði skipulagsstjóri engar skipulagslegar ástæður í vegi þess að Hrafnista fengi vínveitingaleyfi. Ólöf segir að þá hafi þau mannlegu mistök verði gerð að afgreiða umsóknina eins og Hrafnista stæði á þjónustu- og stofnanalóð. Svo sé hins vegar ekki því lóðin sé á skilgreindu íbúðasvæði. Eins og aðalskipulag Reykjavíkur sé í dag þurfi lóðir að vera sérmerktar sem þjónustu- og stofnanalóðir til þess að hægt sé að veita vínveitingaleyfi án breytinga.

Ólöf segir að nú standi þó yfir endurskoðun á aðalskipulagi borgarinnar og við hana verði rýmkað til fyrir tilvik eins og Hrafnistu þar sem ekki sé eingöngu um að ræða íbúðir á svæðinu heldur einnig margs konar þjónustu.

Eins og komið hefur fram verður nýr borðsalur opnaður á Hrafnistu í sumarlok og þar er meiningin að nýta vínveitingaleyfið. Nokkur töf verður á því.

"Við reiknum með að endurskoðað aðalskipulag verði samþykkt fljótlega upp úr áramótum. Vonandi greiðist úr þessu sem fyrst," segir skipulagsstjóri.

- gar