Býður upp á nýja tegund posa

Íslenska fyrirtækið Handpoint hefur hafið að bjóða fyrirtækjum hér á landi posaþjónustu. Fyrirtækið hefur um árabil boðið lausnir á þessu sviði erlendis en samhliða innleiðingu korta- og pinn-posa hér á landi hyggst það hefja landvinninga hér.

„Í fyrst lagi finnst okkur rosalega gaman að geta loksins boðið innlendum fyrirtækjum upp á valkost í þessum efnum," segir Erla Ósk Ásgeirsdóttir, markaðsstjóri Handpoint, og heldur áfram: „Þá keppum við ekki bara í verði heldur bjóðum við upp á ýmsar nýjungar. Í því samhengi má nefna svokallaða vefgátt sem gerir fyrirtækjum kleift að fara á vefinn og sjá allar færslur sem er svo auðvelt að prenta út. Þá eru tveir góðir kostir við okkar posa að þeir krefjast hvorki sér internetsnúru né sér rafmagnssnúru."

Handpoint var stofnað árið 1999 og hefur unnið að þróun greiðslulausna frá árinu 2004. Hjá fyrirtækinu starfa 35 starfsmenn í þremur löndum en það sérhæfir sig nú í greiðslulausnum fyrir fyrirtæki sem gera þeim kleift að taka á móti korta- og pinn-greiðslum með öruggum hætti.

Á Íslandi hafa hingað til verið í notkun posar sem lesa segulrönd greiðslukorta. Um þessar mundir standa yfir skipti yfir í svokallaða korta- og pinn-posa sem lesa örgjörva á kortum auk þess sem eigandi kortsins þarf að staðfesta færsluna. Handpoint hefur sérhæft sig í lausnum sem byggja á kort- og pinn-greiðslukerfi. Fyrirtækið hefur því ekki boðið þjónustu sína á Íslandi þangað til nú en það hefur meðal annars haslað sér völl í Bretlandi.

Erla Ósk segir að viðtökur fyrirtækisins hér á landi hafi verið mjög góðar. „Markaðinn greinilega þyrsti í samkeppni og við höfum þegar kynnt þjónustu okkar fyrir flestum stærstu söluaðilum landsins."

Loks segir Erla að fyrirtækið muni á næstu mánuðum kynna fleiri greiðslulausnir en hefðbundna posa og nefnir til að mynda smáposa sem tengjast snjallsímum og spjaldtölvum.- mþl