Guðmundur til reynslu hjá Hoffenheim

Sóknarmaðurinn Guðmundur Þórarinsson, leikmaður ÍBV, er á leið til Hoffenheim í Þýskalandi þar sem hann verður til reynslu hjá liðinu. Þetta kom fram á vef Eyjafrétta.

Guðmundur mun dvelja í eina viku hjá liðinu en Gylfi Þór Sigurðsson er samningsbundinn Hoffenheim. Hann er þó í láni hjá Swansea í ensku úrvalsdeildinni þessa stundina.

Guðmundur er Selfyssingur en kom til ÍBV fyrir síðastliðið tímabil. Hann kom við sögu í öllum 22 deildarleikjum liðsins og fjórum bikarleikjum þar að auki, án þess þó að skora.

Hann lék sinn fyrsta deildarleik í meistaraflokki með Selfossi sumarið 2008 en Guðmundur er nítján ára gamall.