Tillaga um rannsókn á einkavæðingu Fjárfestingarbanka atvinnulífsins, Landsbanka Íslands og Búnaðarbanka Íslands verður lögð fram að nýju á Alþingi á þriðjudag. Hún kom fram á síðasta þingi en fékk ekki afgreiðslu.
Skúli Helgason er fyrsti flutningsmaður tillögunnar. Hann segir að tillagan hafi verið afgreidd út úr stjórnskipunar- og eftirlitsnefnd í vor og verið fullunnin. Nefndin þurfi því ekki að leggja mikla vinnu í hana núna og hægt sé að afgreiða hana á skömmum tíma.
„Ég tel að samþykkt þessarar tillögu sé eitt af brýnustu uppgjörsmálum hrunsins og nauðsynlegur liður í því að læra af biturri reynslu síðustu ára.“
Meðflutningsmenn tillögunnar koma úr öllum flokkum, nema Sjálfstæðis- og Framsóknarflokki. Skúli segir að leitað hafi verið til fulltrúa þeirra á síðasta þingi, en þeir ekki viljað vera með. Þá er Guðmundur Steingrímsson, þingmaður utan flokka, á meðal flutningsmanna. Skúli telur að nefndinni dugi sex mánuðir til rannsóknarinnar.
„Það er til samræmis við rannsóknina á sparisjóðunum, sem er í gangi núna. Ég held að þetta sé raunhæf tímaáætlun. Það hefur ýmislegt verið skrifað um einkavæðinguna og það er hægt að nýta sér það. Þörfin á frumrannsóknum er kannski ekki eins mikil.“- kóp
Rannsaka einkavæðingu banka
