Kettir hverfa sporlaust á Eyrarbakka

Fjölmargir kettir hafa horfið sporlaust á Eyrarbakka það sem af er ári. Það eru alla jafna skógarkettir eða aðrir dýrir kettir sem hverfa og eftir það sést hvorki tangur né tetur af þeim.

Það var tónlistarmaðurinn Johnny King sem sagði frá þessu í útvarpsþættinum Reykjavík Síðdegis á Bylgjunni í dag. Hann er sjálfur dýravinur og hefur misst nokkra ketti á þennan dularfulla hátt. Frá því hann flutti til Eyrarbakka í byrjun árs hafa 16-18 kettir horfið úr bænum. „Og mér skilst að einhverjir hafi líka horfið af Selfossi," segir Johnny. „Og þá eru þeir bara horfnir. Við finnum hvorki hræin né nokkuð annað."

Johnny kann enga skýringu á þessu en menn grunar jafnvel að óprúttnir aðilar standi á bak við hvörfin. „Við vitum ekki hvort einhver er að gera sér leik að þessu en við erum nokkuð sammála um að ef við finnum þann sem er valdur að þessum hvörfum má hann biðja bænirnar sínar og biblíuna aftur á bak og áfram ef hann kann það," segir Johnny, enda segir hann kettina dýrmæta fjölskylduvini.

Johnny hefur sjálfur gengið um allan bæ í leit að köttunum en finnur ekki neitt. „Það hefði verið gaman að finna hræin svo það væri þá hægt að grafa þá," segir hann.

Johnny er nú búinn að fá sér lítinn chihuahua hund í staðinn fyrir kettina. „Ég vona að ég fái að vera í friði með hann," segir hann.

Viðtalið í heild sinni má nálgast á hlekknum hér að ofan.