Mocsai: Verður annar eins slagur gegn Íslandi

Tamas Mocsai átti stórleik þegar að Ungverjaland hafði betur gegn Serbíu í hreinum úrslitaleik um hvort liðið myndi mæta Íslandi í fjórðungsúrslitum keppninnar.

Mocsai kom sterkur inn í leikinn á seinn stigum fyrri hálfleiks og blómstraði svo algjörlega í þeim síðari. Alls skoraði hann níu mörk í leiknum, þar af sjö í seinni hálfleik.

„Þetta var mjög erfiður leikur og mikið af tilfinningum í spilinu," sagði Mocsai við Vísi eftir leikinn. „Þetta var mikilvægasti leikur okkar á mótinu en fyrirfram vissum við að við þyrftum að vinna bæði Suður-Kóreu og Serbíu til að komast áfram upp úr riðlinum."

„Við vorum því afar einbeittir og uppskárum sigur. En þetta var mikil slagur og mikil barátta."

Ungverjar sneru leiknum sér í hag í síðari hálfleik, ekki síst vegna frammistöðu Mocsai en einnig vegna afar sterks varnarleiks.

„Vörnin var góð og við fengum nokkur auðveld en dýrmæt mörk vegna hennar. Vissulega var þetta góður dagur hjá mér en ég er fyrst og fremst ánægður með að hafa getað lagt mitt af mörkum fyrir liðið."

Leikurinn gegn Íslandi í fjórðungsúrslitum verður á miðvikudaginn en leiktíminn hefur ekki verið gefinn út. Mocsai á von á erfiðum leik.

„Ísland hefur verið að spila mjög vel á þessu móti. Við þurfum að spila sérstaklega í vörn og fá góða markvörslu ef við ætlum okkur að vinna þá."

„Við vitum hversu gott lið Ísland er með enda fór vann það silfur á síðustu Ólympíuleikum. En við skulum sjá til - ég á alla vega von á öðrum eins slag."